Şamaxıda gənc kimyaçıların yay məktəbi adlı tədbir keçirilir
AMEA Kimya Elmlər Bölməsi və Gənc Alim və Mütəxəssislər Şurasının birgə təşkilatçılığı ilə kimya sahəsində tədqiqatlar aparan gənclər üçün “Gənc kimyaçıların yay məktəbi – 2018” adlı tədbir keçirilib.
İyulun 4-də AMEA-nın Şamaxı Astrofizika Rəsədxanasında yay məktəbinin açılışı olub.
Əvvəlcə iştirakçılara rəsədxananın foyesində təşkil edilən sərgilər əsasında bu elm mərkəzi barədə ətraflı məlumat verilib.
AMEA-nın vitse-prezidenti, akademik Dilqəm Tağıyev çıxış edərək “Gənc kimyaçıların yay məktəbi-2018”in akademiyanın tarixində gerçəkləşdirilən ilk təşəbbüs olduğunu bildirib. Qeyd edib ki, gənc alim və mütəxəssislərin bir-birini yaxından tanımaları, qeyri-rəsmi müstəvidə aktual mövzularda fikir mübadiləsi aparmaları baxımından bu cür məktəblər xüsusi əhəmiyyət kəsb edir. Akademik kimyaçıların yay məktəbində bölməyə daxil olan 4 institutdan 12 fəlsəfə doktoru, 16 doktorant və 6 magistrant olmaqla, ümumilikdə 34 gənc mütəxəssisin iştirak etdiyini diqqətə çatdırıb.
Daha sonra çıxış edən rəsədxananın direktoru, AMEA-nın müxbir üzvü Namiq Cəlilov yay məktəbinin iştirakçılarına uğurlar arzulayıb, astrofizika elmi ilə kimya elminin qarşılıqlı əlaqələri barədə fikirlərini söyləyib, bu mövzuda müzakirələrin aparılmasının əhəmiyyətini vurğulayıb.
Gənc Alim və Mütəxəssislər Şurasının sədri, fizika üzrə fəlsəfə doktoru, dosent Famin Salmanov yay məktəbinin əhəmiyyətindən danışaraq qeyd edib ki, ilk dəfə keçirilən bu tədbirə maraq gözlənildiyindən çox olub. Kimya sahəsində tədqiqatları ilə fərqlənən gənc alim və mütəxəssislər yay məktəbində iştirak etmək üçün hüquq qazanıblar. O, yay məktəbinin məqsədi və formatı haqqında gəncləri, yerli icra orqanlarının nümayəndələrini və media təmsilçilərini məlumatlandırıb.
Tədbirin rəsmi açılışından sonra 4 aktual mövzuda məruzələr dinlənilib, gənc kimyaçılar arasında fikir mübadiləsi aparılıb.
Qeyd edək ki, 5 gün müddətində gənc kimyaçılar müxtəlif elmi-intellektual və əyləncəli tədbirlərdə iştirak etməklə kimya elminin yeni prioritetlərinə dair biliklərini təkmilləşdirəcək, habelə yay mövsümündə vaxtlarını səmərəli keçirəcəklər. Belə ki, ilk günlərdə prioritet istiqamətlərlə bağlı AMEA-nın kimya bölməsinə daxil olan elmi müəssisələrdə aparılan tədqiqatların nəticələri yay məktəbində müzakirə ediləcək.
Sonrakı günlərdə iştirakçı gənclər teleskopla ulduzları müşahidə edəcək, ulduzlar sistemi haqqında sənədli filmlərə baxacaq, habelə Şamaxı rayonu ərazisindəki tarixi məkanlara ekskursiyalara gedəcəklər.
Tədbirin sonunda iştirakçılara sertifikat və hədiyyələr veriləcək.
